വാക്‌സിനെടുക്കാത്ത മാലോട്ട് സ്വദേശിക്ക് വാക്‌സിന്‍ സ്വീകരിച്ചെന്ന സര്‍ട്ടിഫിക്കറ്റ്…!
ആരോഗ്യവകുപ്പിന്റെ ഗുരുതര വീഴ്ച;
വാക്‌സിനെടുക്കാത്ത മാലോട്ട് സ്വദേശിക്ക് വാക്‌സിന്‍ സ്വീകരിച്ചെന്ന സര്‍ട്ടിഫിക്കറ്റ്…!
കണ്ണാടിപ്പറമ്പ്: കോവിഡ് വാക്‌സിനേഷനില്‍ ആരോഗ്യവകുപ്പിന്റെ ഗുരുതര വീഴ്ച പുറത്ത്. കോവിഡ് വാക്‌സിന്‍ സ്വീകരിക്കാത്ത യുവാവിന് വാക്‌സിന്‍ സ്വീകരിച്ചെന്ന സര്‍ട്ടിഫിക്കറ്റ് ലഭിച്ചു. കണ്ണാടിപ്പറമ്പ് മാലോട്ട് സ്വദേശി കണിയറക്കല്‍ സുഹൈലിനാണ് വാക്‌സിന്‍ സ്വീകരിച്ചവര്‍ക്കു ലഭ്യമാക്കുന്ന സന്ദേശവും സര്‍ട്ടിഫിക്കറ്റും ലഭിച്ചത്.
നേരത്തേ വാക്‌സിനു വേണ്ടി രജിസ്റ്റര്‍ ചെയ്യുകയും ഒരുതവണ ഷെഡ്യൂള്‍ ചെയ്യുകയും ചെയ്തിരുന്നെങ്കിലും യുവാവിന് കൊവിഡ് ബാധിച്ച് നെഗറ്റീവായതിനാല്‍ മൂന്നുമാസം കഴിഞ്ഞിട്ടേ വാക്‌സിന്‍ സ്വീകരിക്കേണ്ടതുള്ളൂവെന്ന് പറഞ്ഞ്
തിരിച്ചയക്കുകയായിരുന്നു. തുടര്‍ന്ന് വീണ്ടും കുറച്ചുദിവസം മുമ്പ് വീണ്ടും രജിസ്റ്റര്‍ ചെയ്തു. ഇതുപ്രകാരം 23ന് വെള്ളിയാഴ്ച നാറാത്ത് പി.എച്ച്.സിയില്‍ നിന്ന് രാവിലെ 11 മണിക്കും ഉച്ചയ്ക്ക് ഒരു മണിക്കും ഇടയിലെത്തി വാക്‌സിന്‍ സ്വീകരിക്കണമെന്ന് അറിയിച്ച് 22ാം തിയ്യതി വ്യാഴാഴ്ച വൈകുന്നേരം മൊബൈലില്‍ സന്ദേശം ലഭിച്ചു. വെള്ളിയാഴ്ച സ്ഥലത്തില്ലാത്തതിനാല്‍ അന്നും വാക്‌സിന്‍ സ്വീകരിക്കാന്‍ പോവാന്‍ കഴിഞ്ഞിരുന്നില്ലെന്ന് സുഹൈല്‍ പറഞ്ഞു. എന്നാല്‍ ഇന്ന് മൊബൈല്‍ ഫോണിലേക്ക് വന്ന സന്ദേശമാണ് യുവാവിനെ അമ്പരപ്പിച്ചത്. വാക്‌സിന്‍ സ്വീകരിച്ചെന്നും സര്‍ട്ടിഫിക്കറ്റിനു വേണ്ടി താഴെ കൊടുത്ത ലിങ്കില്‍ കയറി ഡൗണ്‍ലോഡ് ചെയ്യണമെന്നുമായിരുന്നു സന്ദേശത്തിലുണ്ടായിരുന്നത്. 23ന് കോവിഷീല്‍ഡ് ഒന്നാം ഡോസ് സ്വീകരിച്ചെന്നാണ് യുവാവിനു ലഭിച്ച സര്‍ട്ടിഫിക്കറ്റില്‍ രേഖപ്പെടുത്തിയിട്ടുള്ളത്. സാധാരണ വാക്‌സിന്‍ സ്വീകരിച്ചവര്‍ക്ക് ലഭിക്കുന്ന സര്‍ട്ടിഫിക്കറ്റ് തന്നെയാണ് ലഭ്യമായിട്ടുള്ളത്. ആരോഗ്യവകുപ്പ് അധികൃതരുടെ അനാസ്ഥയാണ് ഇതിലൂടെ വ്യക്തമാവുന്നത്.
