നിടുവാട്ട് പാലത്തിനു സമീപത്തെ വഴിയിൽ വെള്ളം കയറിയ നിലയിൽ; വഴിമുട്ടി പ്രദേശവാസികൾ

നിടുവാട്ട്: നാറാത്ത് പഞ്ചായത്തിലെ പതിനാലാം വാർഡിൽ ഉൾപ്പെടുന്ന നിടുവാട്ട് പാലത്തിനു സമീപത്തെ വഴിയിൽ വെള്ളം കയറിയ നിലയിൽ. ഇതോടെ പ്രദേശവാസികളുടെ വഴിമുട്ടിയിരിക്കുകയാണ്.
നിടുവാട്ട് പാലത്തിൽ നിന്നും നിടുവാട്ട് ജുമാമസ്ജിദ് റോഡിലേക്കുള്ള കുറുക്കുവഴിയാണിത്. മുമ്പ് ഇതുവഴി ഓട്ടോയടക്കം പോകുമായിരുന്നു. പിന്നീട് റോഡ് കാൽനട – ബൈക്ക് യാത്രയ്ക്കു മാത്രമായി ചുരുങ്ങിയെങ്കിലും അനേകം പേർ ഇതുവഴി ദിനേന സഞ്ചരിക്കാറുണ്ട്. എന്നാൽ, ഇവിടം വെള്ളം കയറിയതോടെ കാൽനടയാത്ര പോലും സാധ്യമല്ലാത്ത അവസ്ഥയാണിപ്പോൾ.
ഇവിടം മണ്ണിട്ട് ഉയർത്തിയോ മറ്റോ ബന്ധപ്പെട്ട അധികാരികൾ വേണ്ട നടപടി കൈക്കൊള്ളണമെന്നാണ് പ്രദേശവാസികളുടെ ആവശ്യം.