കോളേജ് യൂണിയൻ തെരഞ്ഞെടുപ്പ്: യു.ഡി.എസ്.എഫ് പ്രവർത്തകർക്ക് നേരെയുള്ള എസ്.എഫ്.ഐ ആക്രമണങ്ങളെ ശക്തമായി നേരിടും: ലീഗ്

കണ്ണൂര്‍: ജില്ലയിൽ കോളേജ് യൂണിയന്‍ തെരഞ്ഞെടുപ്പില്‍ തങ്ങളുടെ കുത്തകകൾ തകർന്നതിൽ അരിശം പൂണ്ട എസ്.എഫ്.ഐ ക്രിമിനലുകൾ യു.ഡി.എസ്.എഫ് പ്രവർത്തകർക്ക് നേരെ അഴിച്ചുവിടുന്ന ആക്രമണങ്ങൾ നിർത്തിയില്ലെങ്കിൽ അതിനെ ശക്തമായി നേരിടുമെന്ന് മുസ്‌ലിം ലീഗ് ജില്ലാ പ്രസിഡന്റ് അഡ്വ. അബ്ദുൽ കരീം ചേലേരിയും ജനറൽ സെക്രട്ടറി കെ.ടി സഹദുള്ളയും പറഞ്ഞു. തങ്ങളുടെ കാൽക്കീഴിലെ മണ്ണിളക്കി പോകുന്നതിൽ അരിശം പൂണ്ട് എം.എസ്.എഫിന്റെയും കെ.എസ്.യുവിൻ്റെയും പ്രവർത്തകർക്ക് നേരെ കുതിര കയറിയിട്ട് കാര്യമില്ല. ഭരണവർഗ്ഗത്തോട് യുവജനങ്ങൾ കാണിക്കുന്ന പ്രതിഷേധത്തിന്റെ അലയൊളികളാണ് കണ്ണൂർ യൂണിവേഴ്സിറ്റിയിലെ കോളേജുകളിൽ യു.ഡി.എസ്.എഫിന്റെ കുതിച്ചു കയറ്റത്തിന് കാരണമാക്കിയത്. കൃഷ്ണമേനോൻ ഗവ. വനിതാ കോളേജിൽ നിരവധി വർഷങ്ങളായി എസ്.എഫ്.ഐ കുത്തകയാക്കി വെച്ചിരുന്ന യൂണിയൻ ചെയർപേഴ്സണൽ സ്ഥാനത്തേക്ക് ഈ തെരഞ്ഞെടുപ്പിൽ എം.എസ്.എഫ് മുന്നണി സ്ഥാനാർത്ഥി വിജയിച്ചതിൽ അരിശം പൂണ്ട, പുറമേ നിന്നു വന്ന എസ്.എഫ്.ഐ ഗുണ്ടകളാണ് എം.എസ്.എഫ് യൂണിറ്റ് ഭാരവാഹിയും യൂണിയൻ തിരഞ്ഞെടുപ്പിലെ സ്ഥാനാർത്ഥിയുമായ സുഹാനയെ ആക്രമിച്ചതെന്നും, പുറത്തുനിന്നു വന്ന പുരുഷ എസ്.എഫ്.ഐക്കാരനെ കാണിച്ചു കൊടുത്തിട്ട് കൂടി അവിടെയുണ്ടായിരുന്ന വനിതാ പൊലീസ് അടക്കമുള്ളവർ ആ പ്രതിക്ക് രക്ഷപ്പെടാനുള്ള സാഹചര്യമാണ് ഒരുക്കിക്കൊടുത്തതെന്നും ലീഗ് ആരോപിച്ചു. അവസാനം വനിതാ എം.എസ്.എഫ് പ്രവർത്തകർ പൊലീസ് സ്റ്റേഷനു മുന്നിൽ ഉപരോധം തീർക്കുകയും ജില്ലയിലെ ഉന്നത പാർട്ടി നേതൃത്വം ഇടപെടുകയും ചെയ്തപ്പോഴാണ് എ.സി.പിയുടെ നിർദ്ദേശാനുസരണം കേസെടുത്ത് പ്രതിയെ അറസ്റ്റ്ചെയ്യാമെന്ന ഉറപ്പു നൽകിയത്. സർ സയ്യിദ് കോളേജിൽ കടന്നു കയറാമെന്ന വ്യാമോഹവുമായി നടന്ന് പരാജയപ്പെട്ടതിൽ വെപ്രാളം പൂണ്ട എസ്.എഫ്.ഐ ഗുണ്ടകളാണ് കോളേജ് യൂണിറ്റ് എം.എസ്.എഫ് സെക്രട്ടറി ഹഫീസു റഹ്മാനെ തന്റെ വീട്ടിലേക്ക് പോകുന്ന വഴിയിൽ മാരകായുധങ്ങളുമായി ആക്രമിച്ചത്. ഗുരുതരമായി പരിക്കേറ്റ ആഫിസുറഹ്മാൻ കണ്ണൂരിലെ സ്വകാര്യ ആശുപത്രിയിൽചികിത്സയിലാണ്. കണ്ണടക്കമുള്ള അവയവങ്ങൾക്ക് അദ്ദേഹത്തിന് പരിക്കേറ്റിട്ടുണ്ട്. കൂത്തുപറമ്പ് നിർമ്മലഗിരി കോളേജിൽ വെച്ചാണ് കെ.എസ്‌.യു ജില്ലാ പ്രസിഡന്റ് അടക്കമുള്ളവർക്ക് നേരെ ആക്രമണം ഉണ്ടായത്. എസ്.എഫ്.ഐ കാലാകാലങ്ങളായി കുത്തകയാക്കി വെച്ചിരുന്ന ജില്ലയിലെ പല കോളേജുകളിലും യു.ഡി.എസ്.എഫിന്റെ ബാനറിൽ എം.എസ്.എഫ്, കെ.എസ്‌.യു പ്രവർത്തകർ അവരുടെ പതാകകൾ ഉയർത്തിയപ്പോൾ അതിൽ വിളറി പൂണ്ട എസ്.എഫ്.ഐ ഗുണ്ടകളാണ് ഇത്തരം ആക്രമങ്ങൾക്ക് പിന്നിൽ. ഇത്തരം ആക്രമണ പ്രവണതകൾ ഇനിയും നിർത്തിയില്ലെങ്കിൽ അതിനെതിരെ ശക്തമായ ജനകീയ പ്രതിരോധം തീർക്കുമെന്നും,വിദ്യാർത്ഥികളുടെ അവകാശനിഷേധത്തിനെതിരെ പ്രവർത്തിക്കുന്ന എസ്.എഫ്.ഐ ഗുണ്ടകളെ നിലക്ക് നിർത്താനും ക്രിമിനലുകളെ നിയമത്തിനു മുന്നിൽ കൊണ്ടുവരാനും കണ്ണൂരിലെ നിയമപാലകരും ഭരണകൂടവും തയ്യാറായില്ലെങ്കിൽ അതിനെതിരെ ശക്തമായപ്രക്ഷോഭവുമായി മുസ്‌ലിം ലീഗ് മുന്നിട്ടിറങ്ങുമെന്നും നേതാക്കൾ പറഞ്ഞു.